మున్సిపల్ ఎన్నికల్లో కీలక మార్పులు.. నాలుగు పట్టణ స్థానిక సంస్థల్లో నామినేషన్ల గడువు పొడిగింపు

అక్టోబర్ 23, 24 తేదీల్లో నామినేషన్ల స్వీకరణ – నవంబర్ 1న పోలింగ్, 3న ఓట్ల లెక్కింపు

VIJAYAWADA Oct22 :- ఆంధ్రప్రదేశ్‌లో మున్సిపల్ ఎన్నికల నిర్వహణకు సంబంధించి రాష్ట్ర ఎన్నికల సంఘం కీలక నిర్ణయం తీసుకుంది. నామినేషన్లు దాఖలు చేయడానికి అభ్యర్థులకు అడ్డంకులు ఎదురైనట్లు గుర్తించిన నాలుగు పట్టణ స్థానిక సంస్థల్లో నామినేషన్ల గడువును మరో 48 గంటలపాటు పొడిగించింది. ఈ మేరకు రాష్ట్ర ఎన్నికల కమిషనర్ అనిల్ చంద్ర పునేఠా (రిటైర్డ్ ఐఏఎస్) అక్టోబర్ 22న నోటిఫికేషన్ జారీ చేశారు.

రాష్ట్రంలోని 13 మున్సిపల్ కార్పొరేషన్లు, 87 మున్సిపాలిటీలు, నగర పంచాయతీలకు రెండో సాధారణ ఎన్నికల నిర్వహణకు ఇప్పటికే నోటిఫికేషన్ విడుదలైంది. అక్టోబర్ 16 నుంచి 18 వరకు నామినేషన్ల స్వీకరణ, అక్టోబర్ 19న నామినేషన్ల పరిశీలన, అక్టోబర్ 21న మధ్యాహ్నం 3 గంటల వరకు నామినేషన్ల ఉపసంహరణ ప్రక్రియ పూర్తయింది.

సుప్రీంకోర్టు ఆదేశాల మేరకు నిర్ణయం

నామినేషన్ల దాఖలుకు సంబంధించి దాఖలైన వ్యాజ్యంపై అక్టోబర్ 21న సుప్రీంకోర్టు ఇచ్చిన ఆదేశాల మేరకు రాష్ట్ర ఎన్నికల సంఘం ఈ నిర్ణయం తీసుకుంది. జిల్లా కలెక్టర్లు, జిల్లా ఎన్నికల అధికారులు, పోలీస్ కమిషనర్లు, ఎస్పీల నివేదికలతో పాటు అభ్యర్థులు సమర్పించిన వినతులు, ఇతర ఆధారాలను పరిశీలించిన అనంతరం నాలుగు పట్టణ స్థానిక సంస్థల్లో నామినేషన్ల గడువును పొడిగిస్తూ ఉత్తర్వులు జారీ చేసింది.

నాలుగు పట్టణ స్థానిక సంస్థల్లోనే అవకాశం

నామినేషన్ల గడువు పొడిగించిన ప్రాంతాల్లో వైఎస్ఆర్ కడప జిల్లాలోని కడప మున్సిపల్ కార్పొరేషన్, రాజంపేట మున్సిపాలిటీ, మైదుకూరు మున్సిపాలిటీతో పాటు తిరుపతి మున్సిపల్ కార్పొరేషన్ ఉన్నాయి.కడప మున్సిపల్ కార్పొరేషన్‌లో 11 వార్డులకు, రాజంపేట మున్సిపాలిటీలో 11 వార్డులకు, మైదుకూరు మున్సిపాలిటీలోని అన్ని 32 వార్డులకు, తిరుపతి మున్సిపల్ కార్పొరేషన్‌లో 18 వార్డులకు ఈ గడువు పొడిగింపు వర్తిస్తుంది.అభ్యర్థులు అక్టోబర్ 23, 24 తేదీల్లో ఉదయం 11 గంటల నుంచి మధ్యాహ్నం 3 గంటల వరకు నామినేషన్లు దాఖలు చేయవచ్చు. ఇప్పటికే నిర్ణయించిన నామినేషన్ కేంద్రాలతో పాటు, సంబంధిత జిల్లా కలెక్టర్లు సూచించిన కలెక్టరేట్ ప్రాంగణాల్లో కూడా నామినేషన్లను స్వీకరిస్తారు.కొత్తగా దాఖలైన నామినేషన్ల పరిశీలన అక్టోబర్ 25న ఉదయం 8 గంటల నుంచి నిర్వహిస్తారు. కొత్తగా నామినేషన్లు దాఖలు చేసిన అభ్యర్థులు అదే రోజు మధ్యాహ్నం 3 గంటల వరకు తమ నామినేషన్లను ఉపసంహరించుకోవచ్చు.

నవంబర్ 1న పోలింగ్.. 3న కౌంటింగ్

రాష్ట్రంలోని మొత్తం 100 పట్టణ స్థానిక సంస్థలకు సవరించిన ఎన్నికల షెడ్యూల్‌ను రాష్ట్ర ఎన్నికల సంఘం ప్రకటించింది. దీని ప్రకారం అక్టోబర్ 25న మధ్యాహ్నం 3 గంటల తర్వాత పోటీలో ఉన్న అభ్యర్థుల తుది జాబితాను ప్రచురిస్తారు.నవంబర్ 1న ఉదయం 7 గంటల నుంచి సాయంత్రం 5 గంటల వరకు పోలింగ్ నిర్వహిస్తారు. అవసరమైతే నవంబర్ 2న ఉదయం 7 గంటల నుంచి సాయంత్రం 5 గంటల వరకు రీపోలింగ్ చేపడతారు. నవంబర్ 3న ఉదయం 8 గంటల నుంచి ఓట్ల లెక్కింపు ప్రారంభమవుతుంది.

పరోక్ష ఎన్నికలకు సంబంధించిన సవరించిన షెడ్యూల్‌ను ప్రత్యేకంగా విడుదల చేయనున్నట్లు రాష్ట్ర ఎన్నికల సంఘం వెల్లడించింది.నామినేషన్ల దాఖలులో ఇబ్బందులు ఎదుర్కొన్న అభ్యర్థులకు మరో అవకాశం కల్పించడంతో పాటు, ఎన్నికల ప్రక్రియను సజావుగా నిర్వహించేందుకు ఈ నిర్ణయం తీసుకున్నట్లు రాష్ట్ర ఎన్నికల సంఘం నోటిఫికేషన్ స్పష్టం చేస్తోంది.